Kamma Global Federation Summit 2024: రేవంత్ రెడ్డి ఎన్టీఆర్ గురించి ప్రత్యేక వ్యాఖ్యలు 🗣️

Kamma Global Federation Summit 2024 : రాజకీయాల్లో ఎన్టీఆర్​ ఒక బ్రాండ్​ అని అనర్గళంగా మాట్లాడటం ఆయన నుంచే నేర్చుకున్నట్లు ముఖ్యమంత్రి రేవంత్​ రెడ్డి తెలిపారు. హైదరాబాద్​ హెచ్​ఐసీసీలో జరిగిన కమ్మ ప్రపంచ మహాసభల్లో సీఎం ముఖ్య అతిథిగా పాల్గొన్నారు. కమ్మ గ్లోబల్​ ఫెడరేషన్​ ఆధ్వర్యంలో రెండు రోజుల పాటు ఈ సభలను నిర్వహించనున్నారు. సీఎం జ్యోతి ప్రజ్వలన చేసి సభను ప్రారంభించారు. ఈ కార్యక్రమంలో మంత్రులు పొంగులేటి శ్రీనివాస్​ రెడ్డి, కోమటిరెడ్డి వెంకట్​ రెడ్డి, రాష్ట్ర ప్రభుత్వ సలహాదారు వేంనరేందర్​ రెడ్డి, ఎమ్మెల్యే అరికపూడి గాంధీ హాజరయ్యారు.

ఈ సందర్భంగా సీఎం రేవంత్​ రెడ్డి మాట్లాడుతూ, కమ్మ అంటే అమ్మ లాంటిది అని మట్టి నుంచి బంగారం తీయగల శక్తి కమ్మవారికి ఉందని పేర్కొన్నారు. తాను ఎక్కడ ఉన్నా కమ్మ సామాజిక వర్గం నన్ను అభిమానిస్తుందని తెలిపారు. ఎన్టీఆర్​ లైబ్రరీలో చదువుకున్న చదువే ఉన్నతస్థాయికి తెచ్చిందని అన్నారు. ఎన్టీఆర్​ ఇచ్చిన అవకాశాల వల్లే నేడు చాలా మంది రాజకీయాల్లో ఉన్నారని గుర్తు చేశారు. ఎన్టీఆర్​ ప్రవేశపెట్టిన సంకీర్ణ రాజకీయాలే నేడు దేశాన్ని ఏలుతున్నాయని చెప్పారు. ఎన్టీఆర్​ మద్దతుతో బీజేపీ రెండు సీట్లలో ఒక ఎంపీ సీటు గెలిచిందన్నారు. అమరావతి నుంచి సిలికాన్​ వ్యాలీ వరకు మీ కృషిని ఎవరూ కాదనలేరని హర్షించారు.